خذلتني الأبجديه ...

لقد خذلتني الأبجديه هذه المره ...

حقاً اريد ان اكتب ما في نفسي .. ولكـــــ   ــن

لا تكفي تلك الحروف لوصف الجروح التي تنزف بداخلي

اعذريني ايتها الأبجديه فالصمت راق لي بالرغم من جمالك 

نوفـــ ... 3/>

انا تغيرت . . .

اكتشفت ان العمر والسنين مو كل شي بأن الأنسان ينضج ويكبر وتفكيره يتغير 

كان كل همي بالدنيا اني اغير تفكير اهلي واخلي حياتي نفس حياه الأجانب ،، حريه وانفتاح وكل اللي ابيه يسير

وكبرت والتفكير هذا بدى يزيد فيني وكنت كل ما احاول اتقدم خطوه عشان اعيش الحياه اللي اتمناها ،،

اشوف المجتمع والعادات والتقاليد والدين واهلي جدار طويييل ما اقدر اتعداه

اغلب مشاكلي مع اهلي كانت لهالسبب ،، وخسرت رضاهم ايام كثيره عشان احاول اسوي اللي ببالي

بس العند اللي عشته والتفكير اللي كنت افكر فيه دخلني بدوامه كبيره اسمها الدنيا 

كبرت قبل سني لاني حاولت اعرف عن اشياء قبل سني ،، هالشي بالنسبه لي ايجابي وسلبي

سلبي لاني ما عشت عمري وطفولتي صح

وايجابي لانه علمني دروس بالدنيا ما بتعلمها لو عشت قد اللي عشته 

للأسف الدنيا طلعت شي ثاني ،، شي مختلف عن اللي رسمته وعشته ،، لمن تكبر كل شي يتغير 

انا ما ادري ليش قاعده اكتب هالشي بس حسيت اني ولأول مره ابي الناس تقراه ...

كتبته كثير ع ورق وشقيته وحرقته ،،، بس الحين ابي الناس تقراه

قاعده اشوف بنات كثير يفكرون بنفس تفكيري القديم ،، ودي انهم يحاولون يحصرون تفكيرهم في مربع عاداتنا

وديننا ،، واللي ربونا عليه اهلنا

لا الانفتاح ولا الحريه بتفيدنا ،، احنا عرب سعوديين مسلمين << للأسف كثير نسو هالشي 

اللي ابي اوصله من هالكلام اللي احسه محيوس ،، ان مهما شفتو بدنيتكم وتألمتو وتعبتو ترى كله خيره

لا تقولون عن نفسكم نفسيه لمن تحسون انكم تعبتو من الدنيا عادي لازم الواحد يحس باللي مر فيه

بس المهم انه ما يعطيه اكبر من حجمه ولا يضخمه

اذا ضاقت عليكم دنيتكم وتعبتو من مشاكلها وهمومها ،، اذا قستكم وخلتكم ما تحسون بأي شي حولكم

لا تلجأون لأي بشر نفسكم ولا حتى لدكتور نفساني ولا حتى لشيخ >> لان في ناس توصل فيهم المراحل لكذا

بس المفروض تلجأون لـ (الله) وتعطونه ايدكم وتخلونه يسيركم وبتوصلون لبر الآمان 

بتمرون بأمواج وتمرون بعواصف قويه ويمكن تطيحون وتغرقون ويكون في بالكم انكم متو

بس فجأه تفتح عيونك وتصحى تلقى نفسك ع احلى جزيره ،، خضار وطبيعه وراحه

خلوكم مع ربي مهما بعدتو ،، باقي الناس لو بعدتو عنهم بينسونكم  او تردون ما تلقونهم بس ربي

مهما بعدت عنه بترد بتلقاه بنفس المكان ينطرك وبأي وقت وبأي زمن ،، بس افرش سجادتك

كلمه لكل الناس اللي عرفتهم بحياتي وهم يعرفوني زين ،، انا تغيرت 

N.H.A

تعليقاتكم ونقدكم يهمني 

فيديوات الأسك واليوتيوب . . .

شي مُستفز

شي يقهر

شي يعصب

شي يخلي الواحد يطلع من طوره

سالفه اللي يردون ع بعض فيديو بالأسك ،، اوك اوك انا ما قلت ان هالشي غلط او غبي او مو حلو 

بس انا تعليقي بالذات ع اللي يتهاوشون ويسبون بعض بالفديو.......!!!!!! ايش افهم يعني من هالحركه

مع احترامي لك اخوي العزيز واختي العزيزه اللي تردون بالفيديو هواش ،،، اذا جاكم سؤال مُستفز 

او سب او غيره من هالأشياء خلاص تجاهلووها خلوكم ارقى من كذا 

صدق والله ايش الفايده بأنك تضيع وقتك قدام الكام بالساعاااااات والله احياناً يجلسون ٧ و ٩ ساعات 

ما سألتو نفسكم شنو قدمتو لنفسكم اول شي ؟؟ نفعتو نفسكم؟؟ اضفتو شي لمخكم؟؟ يعني زدتو علم ؟؟

تبون اقولكم شنو استفدتو ،،،؟ 

ببساطه تكون نشرت عن نفسك سمعه سيئه بالردود اللي تسوي فيها انك تاخذ حقك وحتى لو انت ع حق محد بيقول صح عليك

ثاني شي يروح وقت كان بأمكانك تستثمره بشي احسن

ثالث شي ما زدتو اي معلومه لرصيد معلوماتكم ابد

طيب انتو دام عندكم القدره والحريه انكم تطلعون ع الكامات سووو شي مفيد ،،، يالله شكثر اتمنى اني اقدر اطلع ع الكام عشان اوصل رايي وافكاري للناس كلها ،،،

كل انسان منكم في داخله بذره صالحه حتى ابو لهب وابو جهل فيهم بذره صالحه بس ناقصه انكم تسقونها 

عشان تكبر وتفيدكم وتفيد غيركم.. خلونا نبعد شوي عن التفاهات والهواش حتى بالنت

لو تفتحون اليوتيوب وتشوفون فيديوات شبابنا وبناتنا وتقارنونها بفيديوات ثانيه والله نخجل من نفسنا،،،

اطرحو افكاركم بس بأسلوب حلو وبطريقه علميه وتكون مبنيه ع قاعده ،،

كلكم عندكم افكار انا متأكده وافكار مفيده ما تدرون يمكن الصوت يوصل يمكن تتغير اشياء كثيره لو بيننا وبين بعض لو امور احنا نقدر ننجزها ونسويها 

اتمنى نرتقي بتسجيلاتنا وكلماتنا ونقاشاتنا ،،،،

N.H.A

اتمنى اشوف تعليقاتكم لانها تعني لي الكثير واتقبل اي نقد

early marriage

Marriage is completing our second half of your life, that’s in my religion “islam”.  Marriage is a big commitment, its 99% of responsibility and 1% of fun. I am not saying that as I am not recommending of it, no at all, but I am saying that we must be carful before we step this major step. Precisely in my region early marriage is something common arguing that the home and marriage prevents the girl from the wrong things, which is totally wrong. I have my own convincing reasons. Firstly, limited experience of the girl in marital life. Secondly, early pregnancy and abortion. Thirdly, Psychological fatigue resulting from this early marriage.

Marital life requires extensive experience and this experience don’t exist in the young girl. Her thoughts are limited on games and toys. She will never think about what the man would want or what is her responsibility to him. Men and house need special care and treatment.

Pregnancy for a young girl it will effect her health. A young body couldn’t carry another person inside her. Lack of pregnant experience and how to tack care of her self and her baby. Pregnancy of a young girl would mostly lead her to a abortion.

At the end the young girl will grow up and recognize what is going around her and she will feel that what happen is a crime to her. On the other hand her family and husband wouldn’t control her nerves.

We need awareness about early marriage in our society. In my opinion nowadays this problem is start to vanish. Even if the problem is totally disappear it will keep behind an effects 
in the society. So be careful and leave the decision to the girl.


N.H.A

صراع الأجيال

هل تعاني من مشكله ان ابوك ما يفهمك . . . ؟

هل تعاني من مشكله ان امك ما تفهمك . . . ؟

اذا تعاني من مشكله مع امك او ابوك او احد من اخوانك اللي يكبرك ب ٩ سنوات او اكثر ،،، ترى الخطأ 

لا فيك ولا فيهم الخطأ بالفتره الزمنيه اللي بين الفتره اللي عاشوها هم واللي انت تعيشها 

يعني باختصار الزمن اللي عاشو فيه مبادأهم وتفكيرهم ومعتقادتهم تفرق وتختلف كثيييير عن اللي نعيشه احنا الحين

انا بتكلم عن تجربتي والشي اللي يواجهني بشكل شبه يومي مع امي وابوي ....

امي تعارضني التفكير بكثير اشياء وابوي بعد وكنت اناقش واحاول اغير من تفكيرهم عشان يقتنعون بكلامي بس للأسف ؛كانت مرات فشلي اكثر من مرات نجاحي ،،، لمن كبرت فهمت الدنيا وتعلمت شي ،، ان احنا الجيل المرن وبما ان احنا نعتبر مرنين في التعامل يعني احنا اللي لازم نتنازل وهالشي ادري صعب كثييييير منكم يسويه بس لازم اجنا نتنازل ولا راح توصل علاقتك مع ابوك وامك الى طريق مسدود

اللي تعلمته اني احاول قدر الامكان اني ما ارادد واحاول اخليهم يسمعون اللي يبون ترى الجيل القديم مفتاحهم الكلمه الحلوه ،، تعال لامك او ابوك وهو بعز صراخه عليك وقوله ابشر تامر امر ورب البيت يسكت لو مو من اول مره من ثاني او ثالث مره بيستحي ويسكت،،، 

كثير شباب وبنات يقولون خلاص احنا مو فاهمينهم وهم مو فاهميننا خلي بيننا وبينهم السلام والمصروف وبس ...!!!

لا !! ليش نوصل العلاقه لهالمرحله ،،، المفروض نحاول نفهمهم مهما كان الموضوع يتطلب 

اتبع خطوات بسيط بس وهي اللي راح تكسبك رضاهم وتكسبك انهم يوافقون ع كل شي انت ما تبيه 

وهالخطوات كلها تنحصر في ( الآحترام والكلمه الحلوه )

N.H.A

اتمنى اشوف تعليقاتكم لانها تعني لي الكثير 

دراما شباب وشابات ربيع العمر . . .

بالنسبه للطلعه الجديده اللي بالناس هاليومين خصوصا اللي في ( ربيع العمر ) 


يجيك واحد او وحده مهمووم ومغتث تقوله شفيك عسى ما شر ... يقولك آآآه يا الدنيا ،، !!!!!!
تقوله شفيها الدنيا ؟!؟!؟
يقولك عذبتني وجرحتني كافي اللي شفته من غدر وطعن آآآه خلاص ابي انتحر ..... والخ من همووم


طبعا انا سميت هالشي ( دراما ) !
ليش تسوي من حياتك دراما ليش تعيش نفسك شي انت ما تعيشه اصلا وليش تعيشه قبل وقته وشنوو شفت اصلا من الدنيا
عيبكنا اننا ما نقرى مو شعب مطلع ... شوفو الناس والشعوب ع مر التاريخ كيف تعذبو وانجزووو
كانو مثل العووود كل ما انحرق كل ما زاد طيب ومثل الذهب كل ما انصر كل ما صار احسن واغلا




طيب دام انتو عندكم هذي المقدره والموهبه انكم تعيشون بشي انتو اصلاً مو عايشنه هذي صفه حلووووه وكل انسان يتمنى انها عنده.. بس ليش ما تستخدمونها احسن يعني بدال ما تعيشون الحزن عيشووو الفرحه 


بدال صوره المخده اللي مكتوب جنبها وسادتي وعذابي ومدري شنو ،،، حطو صوره تفاؤل 
اقرو شوي عن علم النفس ... تثقفو كيف تقدرون تسعدون نفسكم بنفسكم


ايش الهموم والجروح اللي شفتوها وعشتوها ... 
مهما تكون مهمووم قارت نفسك باللي اقل منك ،، بتقولي وانا شدخلني باللي اقل مني انا يالله اشوف همومي ...
بقولك لا! ع كثر ما هموم الناس تلمس قلبك وع كثر ما الدم اللي بجروحهم يختلط بدمك بتحس ! صدقني بتحس بالنعمه اللي انت فيها واللي ربي اكرمك فيها ...


لا تقلبون حياتكم دراما عيشو الواقع عيشو الدنيا الصح مو دنيا الهموم والكأبه ... خلك اقوووى
خلك مثل اعلى لنفسك
خلك مثل اعلى لغيرك


لسه ترى الهموم الصدق ما شفتوها ،،، تبون حياتكم كذا اصبروو لا تستعجلون ع رزقكم .. لسه الدنيا مليانا
بتشوفون
و
بتنقهرون
و
بتندمون
و
بتصيحون
و
بتنهارون


ولا راح تشكون وتسوون دراما زي الحين بالعكس ،، بتدورون السعاده وتضموووونها ،،،
بتتعطشون للضحكه والابتسامه
اي قهر اللي عشتوووه
اي ظلم اللي شفتووه




( تكفوون عيشوو دنيتكم صح عشان مجتمعنا يكون صح ،، المجتمع الحزين واللي يعيش دراما ما ينجز )


الأندلس !! ادري بتقولون بدت تتفلسف بس لازم تسمعون قولو اللي تقولونه عني بس تغيروووو لجل الله
المهم الأندلس شلون راحت !؟!؟!؟! 
لمن الجواسيس كانو يجون الاندلس عشان يشوفون اذا الأسبان يقدرون يغزونها وياخذونها
كانو كل مره يرجعون للأسبان يقولون لهم مافي امل هذا مجتمع قوي همه العلم والانجاز 
هذا مجتمع ما تقدرون تدخلون فيه لأن باختصار مافيه (ثغور) 


بعد فتره جا واحد من الجواسيس ولقى شاب قاعد تحت الشجر وقاله >> مال بالك تجلس حزين؟
قال: لقد هجرتني حبيبتي بالامس فلم اعد اطيق النوم ولا الاكل ولا العمل...


هنا رجع الجاسوس للأسبان وقالهم ( الآن تستطيعون غزو الاندلس )


لانه ترك الاولويات الحياتيه وراح لامور ثانيه ...


زبده موضوعنا لا تعيشون دراما وعيشو الواقع اللي بيروح يروح 
واللي بيخون يخون
واللي بيتكلم فيك يتكلم 
واللي يكرهك خله يكرهك 
كل هالامور بالنهايه لا بتدخلك الجنه ولا بتوقف حياتك واذا وقفت معناته انت اللي وقفتها بنفسك وارادتك ...


اتمنى اشوف تعليقاتكم ع المقال والمقالات الثانيه 
تعني لي الكثير




N.H.A

الحب في زمننا . . . !

الحب صار صعب في حياتنا وفي زمننا هذا....

انا ما اقول ان مافي حب الا في حب بس للاسف ما يدوم والحب اللي ما يدوم لعدم وجود اسباب مقنعه ما يكون حب صافي ومن القلب...

صارت قلوب البشر من كثر ما تدخلها ناس واجناس وتطلع منها،، صارت قابله انها تترك اي شخص تحبه بسهوله او تحب اي شخص ما تعرفه بسهوله....

وطبعاً اتكلم عن قلوب البنات والشباب كلهم صارو كذا...

طيب والحل ؟ شنو نقدر نغير بمجتمعنا عشان يسير الحب خالص، وفي، نظيف، عذري ومن دون لعب ونفاق

انا اقولكم الحل ..

١- " نظف قلبك بالدرجه الأولى" بعدين حاول/ي انك تنظف/ين اللسته حقت البي بي او ارقام الجوالات يعني اقعدو يا البنات فتره بدون شباب ويا الشباب اقعدو فتره من دون البنات،، باختصار غيرو نمط حياتكم اللي صار فوضوي بالجنس الاخر

٢- حاول/ي انك بالاوقات اللي كنت/ي تمليها او تملينها بالشباب او البنات تملونها بشي ثاني انفع يعني تعطون وقت اكبر شوي لدراستكم اهلكم طبعا اللي اكيد مالهم الا كم دقيقه من وقتكم الثمين عطوهم من وقتكم امكم ابوكم اخوانكم 

حاولو تجلسون على هذا الوضع اقل شي من اسبوع الى اسبوعين وبعدها شوفو احساس الفرق ،،،

اللي احاول اسويه اني ارجعكم للفطره الطبيعيه للانسان الطبيعي اللي يمارس حياته مثل ما ربي امره

بعدها بتصفى قلوبكم بترتاحون والله العظيم تتغير امور كثيره بحياتكم....

واتركو نفسكم على هذا الحال المده اللي تحسون نفسكم تحتاجونها،،، المده اللي تحسون كافيه انها تصفي قلوبكم

وبعدها اسمحو لقلبكم انه (يحب)

.......

لمن تطلع من علاقه وتدخل بعلاقه او تدخل باكثر من علاقه بوقت واحد ما راح تعرف تحب هذا مو اسمه حب ابد!!!!!

عطي نفسك مساحه ،، عطي قلبك مجال انه يرتاح انه ينظف بعد اللي كان فيه من قبل ،، عطي فرصه لعقلك يقدر يفكر قبل ما يختار يقارن بين اللي فات واللي جاي يطرح لك الاحسن 

بأختصار فكر قبل لا تحب ومستحيل تقدر تفكر صح الا اذا عطيت عقلك وقت انه يرتاح ويعيد تأهيل نفسه من جديد

N.H.A